वेड लावलंय प्रो कबड्डीनं ...

प्रो कबड्डी… म्हणजेच प्रोफेशनल कबड्डी. आंतरराष्ट्रीय स्तरावरचे कबड्डीपटू प्रो कबड्डीमध्ये झळकताना दिसतायत. अनेक वर्षांचा इतिहास या खेळाला आहे. राज्य आणि आंतरराष्ट्रीय स्तरावर हा खेळ खेळला जात असला तरी क्रिकेट वेड्यांच्या दुनियेत आता तो अस्तित्वासाठी धडपडतोय. अन्य खेळांप्रमाणे या खेळालाही ग्लॅमर मिळावं म्हणून कॉर्पोरेट कंपन्यांनी एकत्र येऊन प्रो कबड्डी स्पर्धा आयोजित केली आणि खेळाडूंची जिद्द आणि रसिक प्रेक्षकांचा उत्साह पाहता कबड्डीची आयपीएल सुरू असल्याचाच भास झाला. 

आयपीएलची मॅच बघताना जो जल्लोष पाहायला मिळतो तसाच जल्लोष मुंबईतल्या NSCI च्या मैदानात पाहायला मिळाला. कबड्डीच्या क्लबमध्ये खेळणारे खेळाडू आणि इतर खेळांमध्ये (Sports) पारंगत असलेल्या खेळाडूंचाही प्रेक्षकांत समावेश होता. संपूर्ण स्टेडियम कबड्डीप्रेमींनी भरलेलं होतं. प्रत्येक टीमला विशिष्टं नावं देण्यात आली होती. यू मुंबाला सपोर्ट करणाऱ्या अनेक प्रेक्षकांचा आवाज स्टेडियममध्ये घुमत होता. सगळ्यात भन्नाट गोष्टं म्हणजे प्रत्येक टीमचं स्वतःचं गाणं होतं. त्यातलं Vizag या टीमचं तेलुगु भाषेतलं गाणं सर्वांनी एन्जॉय केलं. मुंबईच्या टीमसाठी यू मुंबा हे गाणं होतं. पुण्याच्या टीमचं 'पुणेरी फलटण आली रे...' हे गाणंही भाव खाऊन गेलं. पण गाण्यांमुळे एक वेगळाच माहौल तयार झाला होता. कोणत्याही टीमने एखादा गुण पटकावला की त्या टीमचं गाण लावलं जायचं आणि रसिक त्या गाण्यावर ठेका धरायचे. दिमाखात मैदानाशी समरस होणाऱ्या खेळाडूंना पाहताना प्रेक्षकांचा उत्साह क्षणोक्षणी वाढत होता. रंगीबेरंगी लाईट्सचा इफेक्ट ग्लॅमरमध्ये भर घालत होता. 

एकमेकांना सहाय्य करून आपले सात गडी राखण्याचा प्रयत्न या खेळात केला जातो. आपला गडी बाहेर गेला तर त्याला परत आत आणण्यासाठी तेवढ्याच जिद्दीने प्रयत्न केले जात होते. बोनसचे एक-एक गुण मिळवून विरोधी संघाला मागे टाकण्यामध्ये 'यू मुंबा टीम'च्या शब्बीर बापू आघाडीवर होता. 'यू मुंबा' टीमचा कॅप्टन अनुप कुमार यानंही चांगली कामगिरी केली. लेफ्ट टर्न लावणारा 'यू मुंबा टीम'चा जीवा कुमार आणि सांताक्रुझ इथे राहणाऱ्या इशांत यांना दुखापत झाली, परंतु त्याचा परिणाम खेळावर मात्र कुठेच झाला नाही. 

रेडर आणि डिफेन्डर म्हणून आपली कामगिरी बजावणारे खेळाडू जिंकण्याचा पुरेपुर प्रयत्न करत होते. आपलीच टीम जिंकावी यासाठी मॅच (Kabaddi Match) बघायला आलेला प्रत्येक जण प्लेयर्सना प्रोत्साहन देत होता. आपल्या प्रत्येक खेळाडूने चांगली कामगिरी बजवावी यासाठी त्या-त्या टीमचे कोच योग्य वेळी टाइम आऊट घेऊन आपल्या संघाला मार्गदर्शन करत होते. सर्वांचंच लक्ष गुणांकडे लागलं होतं. एकेका गुणासाठी खेळाडू जिवाचं रान करत होते. जिद्द, चिकाटी, मेहनत आणि आशीर्वाद या सगळ्याची सांगड इथे सतत जाणवत होती. सामना अटीतटीचा होत होता त्यामुळे प्रक्षेकांचं आणि खेळाडूंचं टेन्शन वाढतच चाललं होतं. गेम कधी पलटेल याचा काहीच अंदाज नव्हता आणि शेवटी 'यू मुंबा'ने बाजी मारली. या टीमच्या सपोर्टर्सनी स्टेडियम डोक्यावर घेतलं. 

प्रो कबड्डीने प्रेक्षकांना तर समाधान दिलंच शिवाय आंतरराष्ट्रीय स्तरावर खेळूनही अद्याप प्रसिद्धीच्या झोतात न आलेल्या अनेक डिफेन्डर्स आणि रायडर्सना ग्लॅमरही मिळवून दिलं.